ليكْ نَهْدي الورد البَلْدي – الزجال عبدالقادر بوبول

• عبدالقادر بوبول 

ولن تغيبي
انت گمرة فدمي
انت الخارجة من ضلعي
ان ترمي بي طرقاني
نلقى ظلك بين فادي …
كل خطوة توديني ليك
وانت، ما تغيبي
جمر الدنيا فيا يگدي
يبقى لي منك الشوگ
دمعي يجري ويدان
نزرع وجهك فالضيق
ونفرح بك ونشدي
فرحي يا لالة سعدي
يا نجمة
تعيدي وتعاودي
الشمس اليوم ليك تغني
يا الحور
آري يديك
هاكي يدي
خلي الريح بينا تجري
خلينا نتاحدو
انت كوني مرايتي
ووجهك
يا ربيع الوقت
نخزنو عندي تحت جلدي
يا بهجة الگلب
يا ترابي
يا سحابي
يا عز حبابي
ليك نهدي الورد البلدي
ليك السلام
ليك نركع احترام
يا عشبة لقفر
يا دوا الجرح فالصدر
يا باب
وحد السفر
***
گالو :
وجهك گمرة
لوجهك غصان لحقول ترجع خضرة
گالو قطة
گالو صاطة
يا ما گالو
يا المهرة
ما گالو
مال عنقود شبابك ضاع
مالكي تسلكي وتعدي
مالو وقتك وقف
واش الحگرة فن عربي
آش هدا ورثوني جدودي
حضي لمرا
لعدو لمرا
يا ويلي
يا ويلي وحدي
انت غنية حزينة
وزعناك
بين صابون وعجينة
ليلك يشبه نهارك
امتى
تحبس هاد الروينة
انت تفطري وتغدي
انت تحطبي وتربي
انت تعشي وتفرشي
ومن عراك مازالا تودي
وتگولي مرحبا بك يا وعدي
لا من يگول براكا
لا من يشوف وجوه الملايكة
مني وجبد
ومسافات ماليها حد
كيف الطير المذبوح انت
ويوم يجيك الموت
نعيد فصال حياتي على قدي