مـُــورَا كُـــورُونَـــا – للزجال الحاج أمدياز

• الحاج أمدياز (°)

 حَرْب عالمية خَلاَّت البَشَر حَيْران

لَقْوامْ هاربة شَادَّا لَكْوانْ

 لَحْدودْ مَسْدودَة بينْ البَلْدان

وَلَعْدو فيروس فالبَرْ والسما ولبحر سَرْحان

للَجْمَاعَة قاصَدْ إِشَتَّتْ نِيشَان

 إِتْعاداوْ بالسْلاَمْ والبُوسَان

مـُــورَا كُـــورُونَـــا

بانْ البُرْهان

فيروس هاجَم ما عَنْدو فْرَان

ضْرَبْ جْمِيعْ البَلْدان

الشَّلاَلْ فْكُلْ مَيْدَان

جايْحَة تَدِّي وَتْجَر طُوفان

لَوْجاعْ بِينْ الحِيطَان

السْكَاتْ أُو لَكْوانْ

رِيجِيمْ لِيهْ دْوَا بْلاَ ثَمان

مـُــورَا كُـــورُونَـــا

هادْ لْمَكْتوبْ رَاهْ زَادِينا

دَازْتْ عْليكُم وَعْلينا

 وَدِّيتو ودِّينا

مايْلَة أو ما غَرْقاتْ بِينَا السْفِينَة

لاَ تْقولو نْجِينا

دِّيوْهَا شْوِيا فِينَا

المِيزَانْ عْبَارُو إِسَاوِي بِينْكُمْ أُبِينَّا

بَاشْ الدَّنْيَا تَحْلاَ لِيكُمْ أُولِينَا

نَبْدَاوْ مَنْ جْدِيدْ أُو نْسَاوْ مَادَازْ عْلِينَا

مـُــورَا كُـــورُونَـــا

سَرُّو خَلاَّني حَيْران

للغار وَلِيتْ زَرْبان

شَدِّيتْ  لَكْوان

نْقَلَّب عْلَى الآمان

لَلْسَانِي طْلَقْ لَفْران

نُّوحْ وَنْصَيَّحْ بْكُلْ لْسونْ وأَلْحان

وَنْقولْ الله إِجِيب  شِي  طْرجْمانْ

إِدِيرْهَا  تَارِيخْ عْنْوان

وِقُولْ الله إِكُونْ فْلَعْوان

السَّاكْنِينْ فالنْوالَة  فالبَرَّاكَة أُو فْبيتْ مْعَ الجِّيران

أُو مَيَنْساشْ أَللِّي مَاَزال فالْخيمَة وأَللِّي بَرَّا وَللِّي فَالْغِيرَان

مْزاحْمين  لْكُورونا لاَ حَدْ لِيها بَانْ

 حَماوْ روسْهوم وَحْماوْ قُومَان

ليهم خَصْ إِتْدارْ العَزْ والشَّان

إِشَدُّو حَقْهومْ بالمَزْيانْ

أَللِّي مْشَى  لِيهُمْ مَنْ زْمان

مـُــورَا كُـــورُونَـــا

فيروس حْرُوبُو دَايْزا باشْ مَّا كان

كُلاَّ مَن جِيهْتو ضَحَّى بْأيْ ثمان

خَصْ كُلْ البَلْدان

تْقادْ تَساوِي المِيزانْ

إِدومْ  إِتْرسَّمْ  لَخْلاَصْ عْلَى لَكْوان

الصَّحَّة والخَدْمَة وَالسَّكْنْى مَنْ حَقْ كُلْ إنسان

الطِّبْ والتعليم والبَحْثْ العِلْمي قُوَّة لْكُلْ أَوْطان

إِتْسَبْقُو إِتْدارْ ليهُم العَزْ والشَّان

 حْقوقْ مَشْروكَة كُورونا خَلاَّتْهَا عُنوانْ

وْصِيَّة لَلْكُرَة الأرضية بِمَا فِيها مَنْ دَابَّة أُو حَيوان

 دْرُوسْ للَدَّمارْ تْقاومْ  يَا إِنْسَانْ

والعِيشَة تْوَلِّي فْلَهْنا وَالخَاوا وَالأَمانْ 

مـُــورَا كُـــورُونَـــا

(°) زجال له عدة قصائد زجلية، منها أجزاء قيد الطبع، شارك في عدة تظاهرات وملتقيات إقليمية ووطنية