شذرات زجلية للزجال المغربي توفيق البيض

توفيق البيض

عَزّينِي ف راسي

إيلا الظّلاَم كُلُّه
حْتْل فْ كَاع كَاسي،
والكمرة صدقت كذابة
فِيها َماتت النّْفس،
غِير عَزِّيني فْ رَاسِي
حِيث عَينيَّ تْخَالفُوا،
وشْدُّوا العْكس
وحدَة تبْكِي،
والاخرَى دَايرَة عْرس

كُـن وردة

كون وردة

حِيثْ الوَرْدْ

اللّي نْبتْ ف الحقد

ف العين ذابل

حيث الورد

اللي تْسقَى بلا محبة

وبلا ود

ف الرّوح ذابَل

حيث انتَ

تْقدَر بلا محبة

تنسى قلبْك الشّتَا

وتحْلف ب مَاهَا

تحلفْ ب هْواهَا

تحلفْ ب نداها

لجِهة قلبك ما تْصد

الصَّرخة ف الصْدر

 يا حياة

الكلامْ مسَّاس،

واقف عسَّاس،

يا نْكونو عبيد

ونزمْتو الصرخَة

ف الصدر،

يا يقتل فينا النخوة بالحديد والقرطاس

قَلبي عْلى وْضو

تعلمت

قبل ما نْتوضَّا

يْكون قلبي بَعدا

على وضو،

تكون المحبة صلاتي

ويكون عندي

المْوَضّي ب دْموع غيرو

اكثر من عدو

نَرسم شمْسي

 تعلمت من صَغري

نرسَم شمْسي

كيفْ تمنِّيت

تشرق منين تشهَّات

وفين بغات تغرب

وتعلمت نرسم ڭمرة

نحزَّرها تونَسني

ب نْهار تنساني

وف الليل تَعڭب