قصيدة زجلية للزجال أمدياز الحاج: الـــمَـدرســة الــعـُمـومِـيَّـة

• أمدياز الحاج

عْليها شادْ حْزاني

حالها ما هو حال بَكَّاني

شوفو شوفو تْفَرَّجْ فيها البَرَّاني

واشْ هادي حالَة وَلَّى فيها أللي قَراني

الـــمـــدرســة الــعـــمــومـــيــة

بالكونطرا لقرايا وَلاَّتْ أَحَيَّانِي

بالكونطرا الأستاذة والاستاذ فَزْماني

بالكونطرا التربية والمستقبل مَرْهونين تاني

الـــمـــدرســة الــعـــمــومـــيــة

فبلادي تْفَرْجو لكنوس

على هاد الزمان المنحوس

للأستاذة والأستاذ تهرسو الريوس

الـــمـــدرســة الــعـــمــومـــيــة

بغيت نشعر نكتب نبكي  نْدَوَّن نُصُوصْ

شبعنا تْمَرْميد سبان تَحَرُّشْ رْكَلْ ونْصُوصْ

كلامي حزان للمذكرة اليومية أودفتر النُّصُوصْ

الـــمـــدرســة الــعـــمــومـــيــة

أَللِّي ضْرَب أُللِّي قَرَّاه

بايَنْ ضَارَبْ مُّو وَبَّاه

رْضاهُوم ما يَتْرَجَّاه

السخط هْنا ولْهيهْ دَّاه

لبلادو الخير كْرَهْ ما بْغَاه

الـــمـــدرســة الــعـــمــومـــيــة

هادي هِيَ لَقْرَايَا

قولو لبلادي والرَّايَا

صْباح وعْشِيا

وَخَّا نَشْبَعْ رْكَل وَعْصِيَّا

والْبِيعْ والشْرَا فِيَّا

دِيما رَاكُومْ فْعِينِيَا

هَازْكُومْ بِيدِيَّا

ما نسمح فالمدرسة العمومية

الـــمـــدرســة الــعـــمــومـــيــة

هادي وْصِيَّا

لولاد غدا خَلٍّينَا بْريَّا

هَادِي مَنَّا تضْحِيَّة

لَبَلادْنا أُوليكُمْ بْغِينَا لَمْزِيَا ….

الـــمـــدرســة الــعـــمــومـــيــة

ـــــــــــــــــــــــــــــــــــــ

(°) زجال له عدة قصائد زجلية، شارك في عدة تظاهرات وملتقيات إقليمية ووطنية، صدر له مؤخرا ديوان “آر مي” (بالأمازيغية)، وآخر قيد الطبع “مجمع الشكاوي”..