مَــاشِــي الــمَــرْضْ الــخَــايَــبْ – الزجال أمدياز الحاج

أمدياز الحاج (°)

بَوْجَاعْ كلامي ألليلة نَلْعَبْ

 لَبْوَابْ السْراجَمْ مسدودة ضَارَبْ النْقَبْ

 وأللي فِيَّا تْعَجَّبْ

 أُوقالْ عْلاَشْ كَنْقَلَّبْ

 مَنْ حْذِيثِي إِتْقَزَّزْ غَادِي إِهْرَبْ

 إِدْفَلْ فَحْوايْجُو بالزربة إِقيسْ لَخْشَبْ

 الله طَالَبْ إِحْفَظْ عْبَادُو مَنُّو إِحْجَبْ

 مَــاشِــي الــمَــرْضْ الــخَــايَــبْ

 بْقَى فِيا لَمْرِيضْ

أللي عَنْدُو رَامِيدْ

شَابَعْ تْمَرْمِيدْ

 أَمَّا أللي مَا عَنْدُوشْ

إِتْوَجَّعْ وِيزِيدْ

 لَلْمُوحْسِنِينْ إِمَدْ لِيدْ

 مَــاشِــي الــمَــرْضْ الــخَــايَــبْ

 خَصْ دْوَاهْ

 أللي مَحْتَاجْ ليه إِلْقَاهْ

 فَابُورْ بْلاَ ثَمَانْ

هَذا هُوَ مَرْضْ هَاذْ الزَّمَانْ

 مَــاشِــي الــمَــرْضْ الــخَــايَــبْ

 خَصْ حَقْ الصَّحَّة فْلَبْلاَد

ْ إِكُونْ مْسَاوِي بِينْ لَعْبادْ

 بَاشْ لْمَرْضْ كِيفْ مَّا كَانْ

 تَرْضَى بِيهْ لْقُومْانْ

 مَــاشِــي الــمَــرْضْ الــخَــايَــبْ

 الناس عليه دْوَاوْ

 قالو فيه ما بْغاوْ

بالسَّرْ وَالْجَهْرْ تْقَيَّاوْ

 لَمْريضْ خَلْعُو فْرَاحْتُو مَا خَلاَّوْ

لَوْجَاعُو زايْدينْ ما وَاساوْ

 يا ربي يَعْيَاوْ

 لِيهْ إِنْسَاوْ

 وِيوْعَاوْ

 الكيماوي والأشعة فذاتو سَرْحُو تْمَشَّاوْ

 مَــاشِـي الــمَرْضْ الخَايَــبْ

 الطَّبَّا عليه سَهْرو قْرَاوْ

 لَسْبَابُو عارفين وَدْوَاهْ لْقَاو

ْ المَرْضَى بِهْ إِتْصَحُّو إِتْشَفَاوْ

 رَبِّي لَلْعِلَمْ رْشَدْهُومْ ضَحَّاوْ

 بِيهُمْ خَصْنا نَتْعَنَّاوْ

 مَــاشِــي الــمَــرْضْ الــخَــايَــبْ

 الْخوفْ والوسواس

 لاَ دِّيرْهُومْ فَالرَّاسْ

الشجاعة لَدْوَاهْ سَاسْ

 أُولاَ تَسْمَعْ لكلام الناس

 لِيكْ إِتْحَدْ البَاسْ

 أَللِّي فَمًّو خَايَبْ

وَلْسَانُو شَايَطْ سَايَبْ

 سَمَّاهْ المرض الخايب

 مَــاشِــي الــمَــرْضْ الــخَــايَــبْ

مَرْضْ كِيفُو كِيفْ لَمْراضْ

 ليه رَحَّبْ ياللي به تْصَابْ

 عِيشْ حْياتَكْ عَادِي سْمَعْ

 رْضَى بِهْ قْنَعْ

وَاجْهُو تْشَجَّعْ

دْواهْ لِيكْ إِنْفَعْ

 تْشَافَى بْصَحَّة جْدِيدَة تْمَتَّعْ

 مَــاشِــي الــمَــرْضْ الــخَــايَــبْ

 لْصَحْتَكْ عْرَفْ

 بَكْرِي عليه كْشَفْ

لَمْحَايْنُو تْخَفَّفْ

أُومَكْتُوبُو صَرَّفْ

 تْدَاوَى بالْخَفْ

 بْلاَ مَا تْكَلَّفْ

مَــاشِــي الــمَــرْضْ الــخَــايَــبْ

 لْكُلْ مْريضْ بِيهْ

 إِدِيرْ مَجْهُودُو عْلِيهْ

 الله لْكُلْ مَرْضْ قال الدْوَا كَايَنْ ليه

 العز لَلْعُولاَمَا والطَّبَّا المختصين فيه

 الشِّفا للمرضى أللي تْصَابُو بِهْ

 وأللي بالعِيبْ دْوَا فِيهْ

 مَنُّو الله إِنَجِّيهْ

 السماحة لِيه

 هْنَا وَلْهِيهْ …..

مَــاشِــي الــمَــرْضْ الــخَــايَــبْ

 (°) زجال مغربي من مريرت – له العديد من القصائد الزجلية – بعضها قيد الطبع – شارك في عدة ملتقيات إقليمية ووطنية