× الحاج أمدياز (°)
هادي هي قناتي
نشارك معكم فيها حياتي
نوريكم فضايحي فكل وقاتي
روتيني ليومي
تسلفو وتكلفو
فيا تفرجو شوفو
ديرو بحالي غادي تولفو
روتيني ليومي
على لرزق ندور
لْكُلْ ماندير ليكم نصور
باش لطريف لخبز نصور
روتيني ليومي
وجهي مقزدر
ما عندي ما نخسر
ديما معكم بلمباشر بلجهر
روتيني ليومي
معكم فالنيت
فين ما مشيت
تعرفوني أش كانديرنيت
روتيني ليومي
ما عندي ما يدار
لفراجة بلعلالي من كل دار
نضرب الجايحة لكبار والصغار
روتيني ليومي
نونسكوم أناسي
تشوفو لباسي
وفراش نعاسي
روتيني ليومي
هادي هي خدمتي هي همي
معكم ندوي ليل ونهار بفمي
ليا ما تسمعو عيونكوم فلحمي
روتيني ليومي
من لكوزينة معكم ديما
فالدوش نضرب عليكم عوما
من تم نخليكوم عايشين فكوما
روتيني ليومي
أنا عمري بار
فاتني لكار
نزرع السوسة فكل دار
روتيني ليومي
أنا مولات الدار
راضية برزق الدل ولعار
نحرر لعيشة على لكبار والصغار
روتيني ليومي
هاديك ديال هي
أما ديالي انا ليكم مفنيا
منها تهزو تطليو كل بلية
روتيني ليومي
كيف ما تبليت
شِعار ليه هزيت
ندخل كل دار أو بيت
روتيني ليومي
نتعجن نشيش نفتخ جوان
نبلع نبيكي نشم فكل كوان
واللي دار بحالي إتسطى إولي فنيان
روتيني ليومي
تعيشو وحوش فغابة كيف زمان لغول
السرقة ولقتيل وَتَّعَدُّو وإغتصاب الاصول
منكم الزمان إتبرا وسخط الله عليكم منزول
روتيني ليومي
تخسر ليكم السيفا
هازين السيوفا
شادين لحسيفة
روتيني ليومي
كل لقنوات
للديور دخلات
قوام فيها تفرجات
الجايحة ليها ضربات
لولاد غدا جلات بلات
لبحالها قلدات دارت
روتيني ليومي
شكون لينا إنقد
راه تهرس فينا لقد
للروتين ليومي إوضع لحد
ـــــــــــــــــــــــــــــــــــــــــــ
تعليقات
0